1 -

Rit.

Fillus chi oleis formai

de lagrimas dus arrius,

IS CRUDELIS DOLORIS MIUS

UNU PAGU CUNTEMPLAI. (bis)

2 -

Custu coru trapassau

oi si movad’a cumpassioni,

candu su profeta Simeoni

midd’iada profetizzau,

de biri unu fillu amau

in d’una gruxi incravai. Rit.

3 –

Unu Erodi persighendi

a s’amau miu Gesusu,

su dolori prusu e prusu

andad’in mei aumentendi,

de su furori scappendi

a s’Egittu andu a abitai. Rit.

4 -

Seu de penas ingiriada,

po tres disi circu e non biu,

a s’amau Fillu miu

ch’in su templu disputada,

biendimì abbandonara

non mi pozzu consolai. Rit.

5 –

Seu giai sdimaiendi

ca sa pena est troppu forti,

cundennau a infami morti

unu Fillu cuntemplendi,

sa gruxi a spalla portendi

appena poridi andai. Rit.

6 -

Mi mancat giai su respiru

candu in sa penosa gruxi,

de custu mundu sa luxi

eclissada deu da miru,

m’è sollievu su sospiru

consolu su lagrimai. Rit.

7 –

Una crudeli lanzada

chi su pettus ad obertu,

i a Fillu miu ha fertu

e deu mamma sconsolada,

po is penas seu riservada

bivu, ma po agonizzai. Rit.

8 -

Sola atturu in amargura

affliggia e sconsolada,

ca de mei s’est’appartada

s’allerghia e sa dulciura,

una trista sepoltura

m’ha pozziu solu lograi. Rit.

9 –

In sa solidadi trista

bivu immoi abbandonada,

de angustias accumpangiada

e de afflizionis provista,

aundi giru deu sa vista

penas solu app’a incontrai. Rit.

10 -

Cuddu gosu chi tennìa,

cuddu cuntentu in Betlemme,

s’ingrata Gerusalemme

d’iat cunvertìu in agonia,

cudda tanti allerghia

deppìa benni a passai. Rit.

11 –

In luttu funti passaus

cuddus angelicus santus,

is donus e ossequius tantus

de tres reis umiliaus,

tottus funti cambiaus

in penas po turmentai. Rit.

12 -

Po essi issu torrau

a is zurpus sa vista,

poita chi a sa conquista

de animas est bessìu,

de purpura d’ha bistìu

po si’ndi bolli beffai. Rit.

13 –

Po essi sustentu donau

cun abbundanzia a is famìus,

poita medas consumìus

e maladius ha curau,

e mortus resuscitau

morti d’ha boffiu donai. Rit.

14 -

Mortalis chi camminais

e andais po dogna via,

narai si a sa pena mia

una simili ind’incontrais,

si su giustu cunfessais

certu non s’had’a agattai. Rit.

15 –

Mammas chi fillus teneis

e de coru dus istimais,

si affliggia mi mirais,

su motivu ge scieis,

est giustu chi cunfesseis

chi mi pozzu lamentai. Rit.

16 -

Pensa, ingratu peccatori,

chi a morti has cundennau

unu Deus tant’amau,

a suffrì penas e doloris,

po t’essi postu tant’amori

d’has boffiu incravai. Rit.

17 –

A unu tristu desertu

t’incamminas de pippiu,

de penas consumiu

su corpus tuu est fertu,

su rigori tantu espertu

non du sentis po amai. Rit.

18 -

In mesu a tanti genti

sesi stettiu sbregungiu,

tristu in coru affliggiu

in altu tennis sa menti,

cuddu infami presidenti

t’had’a deppi cundennai. Rit.

19 –

Peccau in vida tanti

senza di essi mai cuntentu,

cantus benis tui has tentu

de custu fillu amanti,

ma cantu prus’ainantis

gei d’has’a cumpenzai. Rit.

20 -

Mammas chi fillus prangeis,

pregai de coru a Deus,

in su mundu ci seus

de passada, du scieis.

Su prantu miu imiteis,

bonus custu arregordai. Rit.